| PGMA's Statement on the Eve of the Synchronized Barangay Assembly Day Celebration |
Study Room, Malacanang (28 Mar 2003) |
| ISANG MASIGLA AT MAPAYAPANG
UMAGA ANG PINAPAABOT KO SA LAHAT NG ATING MGA LOKAL NA OPISYAL SA BARANGAY -- MGA PUNONG
BARANGAY, MGA KAGAWAD, MGA SANGGUNIANG KABATAAN -- GAYUNDIN SA LAHAT NG ATING MGA
KABABAYAN. BINABATI KO KAYONG LAHAT MULA LUZON, VISAYAS, HANGGANG MINDANAO SA ARAW NG
ATING PAGSAMA-SAMA, ANG MAGKASABAY NA PAGDIRIWANG NG BARANGAY ASSEMBLY DAY SA BUONG BANSA. LUBHANG NAPAPANAHON ANG OKASYONG ITO SAPAGKA'T NASA GITNA TAYO NG ISANG KRISIS AT PAG-AALALA NG PUBLIKO. ITO AY ANG GIYERA SA IRAQ AT ANG PANGAMBA KAUGNAY NG TERORISMO AT NG EKONOMIYA. ANG DIGMAAN SA IRAQ AT ANG GULO SA MINDANAO AY IISA ANG KAAWAY -- TERORISMO. KAILANGANG ALISAN ANG IRAQ NG MGA ARMAS NG MALAWAKANG PAMUMUKSA DAHIL ANG MGA ITO AY MAARING IPUSLIT DITO SA ATIN AT GAMITIN NG MGA TERORISTA SA PAG-ATAKE SA MGA KAWAWANG SIBILYAN. DITO NATIN MAKIKITA ANG KAUGNAYAN NG GIYERA SA IRAQ AT ANG AKTIBONG DEPENSA NG MGA KOMUNIDAD LABAN SA MGA NAGHAHASIK NG LAGIM SA MINDANAO. HABANG MAHIGPIT NATING NILALABANAN ANG DAHAS NG REBELDE, MASIGASIG DIN ANG MGA HAKBANG NG PAMAHALAAN UPANG MULING MASULONG ANG USAPANGPANGKAPAYAPAAN. INATASAN KO ANG EXPLORATORY TEAM NG GOBYERNO NA HUMANAP NG PARAAN PARA MABALIK ANG PORMAL NA PAG-UUSAP, LUTASIN ANG SITWASYON NG MGA NAGSILIKAS SA PIKIT, AT WAKASAN ANG DAHAS NG MGA TERORISTA. AT NAGPAPASALAMAT TAYO SA PAMAHALAAN NG MALAYSIA SA KANILANG WALANG SAWANG PAG-SUPORTA SA MAHABANG PROSESONG PANGKAPAYAPAAN SA MINDANAO. SA KABILA NITO, BINABALAAN KO ANG MGA ARMADONG GRUPO NA HUWAG SAMANTALAHIN ANG SITUWASYON PARA HAMUNIN ANG PAMAHALAAN. HINIHILING KO RIN SA MGA GRUPONG NAGDARAOS NG KILOS-PROTESTA NA HUWAG MAGPAKALAT NG MGA MALING BALITA AT IMPORMASYON, AT HUWAG IPULITIKA ANG GIYERA NA MAGING DAHILAN NG ATING LALONG PAGKAWATAK-WATAK. HIGIT KAILANMAN, NGAYON TAYO LALONG DAPAT MAGKAISA AT MAGTULUNGAN TUNGO SA IISANG DIREKSYON. MALAKI ANG POSIBILIDAD NA ANG MGA KASABWAT NI SADDAM HUSSEIN AY GUMAMIT NG NAKAKAKILABOT NA SANDATANG KIMIKAL O PAGSABOG NG MGA PAG-ATAKE NG TERORISMO SA IBA'T-IBANG DAKO NG MUNDO. ITO ANG DAHILAN KUNG BAKIT INATASAN KO ANG ATING MILITAR AT PULIS NA MAGING LUBOS NA ALERTO AT MAKIPAG-UGNAY SA MGA LOKAL NA PAMAHALAAN AT MGA KOMUNIDAD. GINAGAWA NG GOBYERNO ANG LAHAT PARA HARAPIN ANG KRISIS, PERO HINDI TAYO DAPAT MAGING KAMPANTE AT LUWAGAN ANG ATING PAGBABANTAY. MAGING LISTO TAYONG PALAGI AT KALMADO PARA MALAMPASAN ANG UNOS NA 'TO. HINIHILING KO ANG ATING BUO AT TAPAT NA PAGMAMATYAG. GAYA NG IBANG BANSA, DAPAT TAYONG MAGING LISTO LABAN SA TERRORIST ATTACKS O PAG-ATAKE NG MGA DESPERADONG EXTREMISTS. SAPAGKA'T ANG TERORISMO AY MALAKAS ANG LOOB, HINDI SAPAT ANG PAGKILOS NG PAMAHALAANG NASYONAL LAMANG. ANG PAKIKIPAGTULUNGAN AT PAGMAMATYAG NG BUONG KOMUNIDAD AT LAHAT NG PAMAHALAANG LOKAL AY KAILANGAN UPANG ANG PILIPINAS AY MAGING LIGTAS PARA SA MGA MAMAMAYAN. ANG BAGONG BANTA NG SIGLO BEINTE-UNO, ANG TERORISMO, AY KAILANGAN NG PUSPUSANG KILOS NG BUONG PAMAHALAAN HANGGANG SA HANAY NG BARANGAY PARA BANTAYAN ANG MGA NAKAKAHINALANG TAO, PAGKILOS AT KAGAMITAN. KAYA NAMAN, INATASAN KO NA ANG LAHAT NG PAMAHALAANG LOKAL NA PULUNGIN KAAGAD ANG INYONG CRISIS MANAGEMENT COUNCILS AT MANGASIWA NANG PERSONAL AT MALAPITAN SA PAGTUPAD NG ATING CONTINGENCY PLANS KAUGNAY NG KRISIS. ITO AY AYON SA MGA TUNGKULIN NG MGA LOCAL LEADERS. MAGTATAGUMPAY LAMANG KAYO SA MGA GAWAING ITO KUNG MAGTUTULUNGAN ANG LAHAT NG MGA BARANGAY NA NASASAKUPAN NG MGA LOCAL LEADERS. ANG ATING MGA LOCAL LEADERS ANG DAPAT MAGING CRISIS MANAGERS SA INYONG MGA KOMUNIDAD. KAYO ANG MANGANGASIWA SA PAGMATYAG SA LAHAT NG KLASE NG PROBLEMANG SOSYAL AT EKONOMIKAL NA KAUGNAY SA KRISIS, TULAD NG PRESYO NG MGA PANGUNAHING BILIHIN AT PARA TIYAKIN NA ANG KOMUNIDAD AY LIGTAS LABAN SA LAHAT NG URI NG TERORISMO. BUKOD SA PAGMATYAG LABAN SA TERORISMO, KAILANGAN DING MAGBANTAY ANG MGA MAMAMAYAN LABAN SA MGA NAIS MAGSAMANTALA SA KRISIS, TULAD NG PAGTAGO NG SUPPLY NG PAGKAIN O PANINGIL NG SOBRA. BAGAMA'T MAY MONITORING TEAMS TAYO NA NAG-IIKOT SA MGA PALENGKE PARA MATYAGAN ANG PRESYO NG MGA BILIHIN, MAHALAGA RING I-REPORT NINYO ANG SINUMANG TINDERA O NEGOSYANTE NA NAGTATAAS NG PRESYONG HINDI DAPAT. ANG MGA LOCAL LEADERS DIN AY INFORMATION CHAMPIONS PARA SA KATATAGAN NG EKONOMIYA AT KAGALINGAN NG PUBLIKO. KAYO AY MAY TUNGKULING IPAALAM SA MGA MAMAMAYAN ANG MGA MAHAHALAGANG PANGYAYARI SA INYONG PALIGID, HARAPIN ANG MGA MALING BALITA AT ESPEKULASYON AT IPAKALMA ANG KOMUNIDAD SA PAMAMAGITAN NG PAGSASABI SA TAONG-BAYAN NG TOTOO. ANG MGA LEADERS DIN ANG ATING ANTI-STREET CRIME CZARS. DAPAT NIYONG PROTEKTAHAN ANG MGA MAMAMAYAN LABAN SA MGA KRIMINAL NA BUMIBIKTIMA SA MGA MAHIHINA AT SA MGA MANLOLOKO NA NAGSASAMANTALA SA KANILANG KAPWA. ANG SUPORTA NG KOMUNIDAD ANG UNANG SUSI PARA MAGING EPEKTIBO ANG PAGSUGPO NG KRIMINALIDAD. KAYA, HINIHILING KO RIN SA ATING MGA MAMAMAYAN NA PAIGTINGIN ANG INYONG PAKIKIPAGTULUNGAN SA ATING PULIS PARA LALONG MABILIS AT MABISA ANG KANILANG PAGSUPIL SA KRIMEN. MGA MINAMAHAL KONG KABABAYAN, ANG LIGTAS AT GALING NG ATING BANSA AY NASA ATING KAMAY. KAYA, MAGKAISA TAYO SA TUNGKULIN NG PAGBANTAY AT PAGPAPAIRAL NG KATAHIMIKAN. BAWA'T PILIPINO AY DAPAT RESPONSIBLE SA KANYANG KAPWA. ITO AY ISANG MAKASAYSAYANG PAGKAKATAON PARA TAYO AY MAGBUKLOD SA PANAHON NG KRISIS NA ILANG BESES NA NATING GINAWA NOON. ANG GANITONG PAGBUKLOD AY DAPAT MAGSIMULA SA ATING MGA BARANGAY KUNG SAAN ANG LAHAT AY MAGKAKILALA AT NAGKAKAISA SA DAMDAMIN AT HANGARIN. MAGSAMA-SAMA TAYO AT MAGTULUNGAN PARA MAIBSAN ANG MGA PAG-AALALANG DULOT NG GIYERA SA IRAQ. MAGSAMA-SAMA TAYO AT MAGTULUNGAN UPANG WALANG NAKA-AMBANG PANGANIB SA ATING DINADAANAN AT MAKATULOG TAYO NG MAHIMBING KASAMA NG ATING MGA MAHAL SA BUHAY. SA ATING MGA BARANGAY NAKASALALAY ANG KAPAYAPAAN AT SEGURIDAD NG ATING BANSA. KAYA NAMAN SA PAGKAKATAONG ITO, HINIHILING KO ANG INYONG TULONG AT HANGAD KO ANG INYONG TAGUMPAY. ANG INYONG TAGUMPAY AY TAGUMPAY NG ATING BANSA AT NG BUONG SAMBAYANAN. ANG INYONG PATULOY NA PAKIKI-ISA AT SUPORTA ANG MAGHAHATID SA ATIN TUNGO SA MATATAG AT MATIBAY NA REPUBLIKA. MAGANDANG UMAGA MULI AT MABUHAY KAYONG LAHAT. |